Në organizim të Ansamblit të Këngëve dhe Valleve “Bajram Shabani” nga Kumanova, u realizua edicioni i gjashtë i festivalit ndërkombëtar “Ballkan Fest”, i cili për dy net radhazi solli në skenë tradita, këngë dhe valle nga vende të ndryshme të rajonit, raporton tvfesta.mk.
Aktiviteti nisi me parakalimin e ansambleve dhe shoqërive kulturore-artistike nëpër rrugët e Kumanovës. Pjesëmarrësit, të veshur me kostume tradicionale, prezantuan kulturën dhe identitetin e vendeve nga vinin, duke i dhënë qytetit një atmosferë festive.
Programi artistik u zhvillua gjatë dy mbrëmjeve. Nata e parë u mbajt në Kumanovë, ndërsa përmbyllja e festivalit u organizua në Shtëpinë e Kulturës në Mateç, në Komunën e Likovës.
Në këtë edicion morën pjesë ansamble dhe shoqëri kulturore-artistike nga Maqedonia e Veriut, Bosnja dhe Hercegovina, Turqia, Kosova dhe Lugina e Preshevës. Përmes interpretimeve të tyre, pjesëmarrësit sollën para publikut larminë e traditave dhe trashëgimisë kulturore të popujve të Ballkanit.
“Ballkan Fest” vazhdon të jetë një ngjarje e rëndësishme për promovimin e folklorit dhe ruajtjen e traditave, duke krijuar njëkohësisht mundësi për shkëmbim përvojash dhe bashkëpunim ndërmjet ansambleve nga vende të ndryshme.
Realizimi i festivalit u mbështet nga Ministria e Kulturës, Komuna e Kumanovës dhe Komuna e Likovës, me kontribut edhe nga afaristë të Kumanovës.
Televizioni Festa, në bashkëpunim me “Ideal Films”, ka përcjellë drejtpërdrejt për dy net me radhë edicionin e gjashtë të festivalit ndërkombëtar “Ballkan Fest”, duke ua sjellë shikuesve nga afër këtë ngjarje kulturore.
Në përfundim të festivalit u ndanë çmimet për pjesëmarrësit dhe grupet që u vlerësuan për paraqitjet e tyre artistike:
- Valltarja më e mirë: Melek – AKV “Nakem”, Turqi
- Valltari më i mirë: Besir Ibrahimi
- Dyshja më e mirë e valltarëve: Behije Hyseni – Altin Saliu
- Valltarët më të mirë: SHKA “Zëri i Kosovës” – Fushë Kosovë
- Koreografia më e mirë: “Nakem” – Turqi
- Këngëtarja më e mirë: Kori “Nexhmije Pagarusha” – Kosovë
- Këngëtari më i mirë: Rilind Krasniqi
- Instrumentisti më i mirë: Skender Halimi
- Orkestra më e mirë: SHKA “Presheva” – Preshevë
- Kostumet më të mira: AKV “SRMA” – Kumanovë
- Çmimi i tretë: AKV “Blagaj” – Bosnjë dhe Hercegovinë
- Çmimi i dytë: SHKA “Zëri i Kosovës” – Fushë Kosovë
- Çmimi i parë: AKV “Nakem” – Bursa, Turqi
- Çmimi special i festivalit: AKV “Ilirida” – Shtime
Edicioni i gjashtë i “Ballkan Fest” u përmbyll me prezantimin e fituesve dhe me një program që vuri në pah rëndësinë e ruajtjes së trashëgimisë kulturore dhe afrimit të komuniteteve përmes këngës, vallëzimit dhe traditës.
