LSDM-ja opozitare ka kritikuar ZNAM-in dhe kryetarin e saj, Maksim Dimitrievski, me rastin e dyvjetorit të formimit të qeverisë, duke pretenduar se partia ka braktisur qëndrimet dhe premtimet e saj fillestare.
Në reagimin e saj, LSDM-ja e cilëson ZNAM-in si “satelit të Mickoskit” dhe ngre pretendime për lidhjen e pjesëmarrjes së saj në pushtet me interesa rreth tenderëve. ZNAM është pjesë e koalicionit qeverisës të udhëhequr nga VMRO-DPMNE, së bashku me VLEN-in.
“Dy vjet punë, dy vjet rezultate, një dashuri – tenderët”, thuhet në reagimin e LSDM-së.
Partia opozitare kërkon gjithashtu nga Dimitrievski të japë sqarime lidhur me pretendimet e saj për financime dhe tenderë, duke pyetur se sa, sipas saj, është përfituar për “versionin e parë të ZNAM-it”.
LSDM-ja thotë se përgjegjësia për veprimet e pushtetit duhet të vlerësohet nga institucionet përkatëse dhe jo në kuadër të aktiviteteve politike.
