Me aktivitete të ndryshme por me kauzën e përbashkët – dhënies fund të abuzimit me fëmijët, privimit nga të drejtat e tyre dhe përmirësimit të jetës…, është shënuar Dita Ndërkombëtare e Fëmijëve – 1 Qershori. Dhe situata është alarmante, sipas të dhënave më të fundit të UNICEF-it, bullizmi nga bashkëmoshatarët në shkollë është ndër format më të zakonshme të dhunës, 23 për qind e të rinjve të moshës 13-15 vjeç kanë raportuar se janë bullizuar të paktën një herë në muajt e fundit
Evis HALILI
Shkup, 1 qershor – Me aktivitete të ndryshme por me kauzën e përbashkët – dhënies fund të abuzimit me fëmijët, privimit nga të drejtat e tyre dhe përmirësimit të jetës…, është shënuar Dita Ndërkombëtare e Fëmijëve – 1 Qershori. Nxënës të shkollave të mesme kanë perfomuar skena dhune, refuzimi dhe vetmie, një manifestimin e organizuar të hënën pranë Parlamentit, për të përçuar mesazhin se mbrojtja e fëmijëve nga dhuna duhet të jetë përparësia më e lartë e një shoqërie dhe se bullizmi ndodh çdo ditë në shkolla, por shpesh kalon pa u vënë re nga të rriturit. Qëllimi është që njerëzit të shohin efektet e dhunës nga bashkëmoshatarët dhe të reagojnë kur vërejnë situata të tilla, thotë Mario, nxënësi që mori pjesë në performancën e vallëzimit social para Parlamentit, shkruan gazeta KOHA.
“Bullizmi kohët e fundit është bërë më pak fizik dhe më shumë psikologjik. Ai manifestohet përmes talljes, injorimit ose izolimit, pa fyerje të drejtpërdrejta, gjë që e bën më të vështirë raportimin dhe njohjen e tij”, u shpreh një tjetër gjimnazist. Mesazhi ishte se megjithëse viti shkollor po mbaron, sfidat me të cilat përballen fëmijët nuk mbarojnë me zilen e fundit shkollore. Viti i ardhshëm shkollor sjell breza të rinj që do të kenë nevojë për një mjedis të sigurt, mbështetës dhe jo të dhunshëm. Me shfaqjen e tyre, nxënësit bënë thirrje për më shumë përgjegjësi, empati dhe masa konkrete për parandalimin dhe mbrojtjen e të gjitha formave të dhunës dhe përjashtimit social.
Dhe situata është alarmante, sipas të dhënave më të fundit të UNICEF-it, më shumë se 2 në 3 fëmijë të moshës 1-14 vjeç në Maqedoninë e Veriut përjetojnë masa disiplinore të dhunshme në shtëpi, agresion psikologjik dhe ndëshkim fizik. Të dhënat tregojnë se bullizmi nga bashkëmoshatarët në shkollë është ndër format më të zakonshme të dhunës mes bashkëmoshatarëve, 23 për qind e të rinjve të moshës 13-15 vjeç në vend kanë raportuar se janë bullizuar të paktën një herë në muajt e fundit.
Dita e Fëmijëve ose Dita Ndërkombëtare e Fëmijëve është një ditë përkujtimore në nder të fëmijëve në mbarë botën. E festuar si pjesë e Proklamatës së vitit 1925 në Gjenevë në Konferencën Botërore për Mirëqenien e Fëmijëve, dita festohet në data të ndryshme në pjesë të ndryshme të botës.
Disa vende e festojnë atë në qershor, disa në nëntor, por qëllimi i ditës ka qenë gjithmonë i njëjtë. Që nga Revolucioni Industrial dhe Luftërat Botërore që pasuan, është vërejtur se fëmijët ishin abuzuar rëndë, shtypur dhe privuar nga të drejtat themelore të njeriut. Duke qenë të dobët dhe të turpshëm, ata mund të detyroheshin lehtësisht në abuzim dhe aktivitete të padrejta, joetike dhe imorale. Ata u shfrytëzuan dhe u manipuluan. Miliona prej tyre u gjetën të kequshqyer. Të gjitha këto zbulime u vunë në dukje gjatë Konferencës së Gjenevës dhe kështu udhëheqësit botërorë vendosën të mbronin fëmijët në mbarë botën. Ndër këto aktivitete, fushat kryesore të cilave iu dha rëndësia më e madhe ishin edukimi i fëmijëve, ushqimi, aktivitetet kundër trafikimit të qenieve njerëzore, si dhe ndalimi i punës së fëmijëve. (koha.mk)
