Pak ditë pas finales së “Big Brother VIP 5”, tensionet mes Selin dhe Mirit vijojnë edhe jashtë shtëpisë. Dy ish-banorët, që në natën finale ishin përballë njëri-tjetrit në garë për çmimin e madh, janë përfshirë në një debat të ashpër në emisionin “Post-BBVIP”.
Selin akuzoi publikisht Mirin se nuk e kishte uruar për fitoren, ndërsa ky i fundit e mohoi kategorikisht, duke thënë se urimi kishte ndodhur, por nuk kishte marrë asnjë reagim nga ana e saj.
Përplasja u thellua edhe më tej, kur Miri rikujtoi një nga momentet e fundit në shtëpi, ku ai u shtri në krevatin që, sipas tij, kishte qenë pikënisja e lojës së Selin. Kjo deklaratë u kundërshtua menjëherë nga fituesja, e cila theksoi se “loja e krevatit” kishte qenë pjesë e strategjisë së Mirit dhe jo e saj.
Debati në studio:
Miri u shpreh se veprimi i tij kishte për qëllim të tregonte se rrugëtimi i të dyve në lojë kishte nisur nga i njëjti vend, ndërsa opinionisti Arbër Hajdari ndërhyri duke e cilësuar këtë si një moment simbolik që mund të “kthehej në tempull”.
Nga ana tjetër, Miri pretendoi se kishte parë pamje të padala në transmetimet “Prime”, duke sugjeruar se disa veprime të Selin nuk ishin shfaqur për publikun. Selin reagoi duke e sfiduar të publikonte këto materiale.
Debati arriti kulmin kur Miri insistoi se e kishte uruar Selin në skenë dhe se nuk kishte marrë as një “faleminderit”, ndërsa ajo ia ktheu duke thënë se ai ishte afruar vetëm për momentin e marrjes së çekut.
Në vijim, të dy shkëmbyen akuza për strategjitë e lojës, ku Miri aludoi për ndikime të jashtme në rrugëtimin e Selin, ndërsa kjo e fundit e mohoi duke theksuar se çdo veprim kishte qenë zgjedhje personale.
Ndërkohë, Arbër Hajdari vuri në dukje kontradiktat në deklaratat e Mirit, duke ngritur pikëpyetje mbi pretendimet për manipulim nga produksioni dhe duke theksuar se vetë fakti që ai e konsideron Selin si finaliste të denjë, bie ndesh me akuzat e tij.
Përplasja mes tyre dëshmon se rivaliteti i krijuar brenda shtëpisë më të famshme në Shqipëri vazhdon të mbetet i fortë edhe pas përfundimit të spektaklit.
