Policia e Kosovës ka raportuar për disa raste të ndara të posedimit të paautorizuar të armëve gjatë datës 17.04.2026, ku në disa prej tyre janë arrestuar të dyshuar dhe janë sekuestruar armë zjarri.
Në Prishtinë, në rrugën “Sofokliu”, më 17.04.2026 rreth orës 00:19, një i dyshuar është arrestuar pasi dyshohet se kishte drejtuar pistoletën në drejtim të një personi tjetër. Nga i njëjti është sekuestruar një armë me një karikator dhe tetë fishekë, ndërsa me vendim të prokurorit është dërguar në mbajtje.
Ndërkohë, në Podujevë, fillimisht kishte ndodhur një rast paraprak më 04.01.2026 rreth orës 20:30, ndërsa më 17.04.2026 është arrestuar i dyshuari lidhur me ngjarjen që kishte përfunduar me lëndim të rëndë trupor. Gjatë arrestimit, policia ka konfiskuar një pistoletë që dyshohet të jetë përdorur në incident dhe i dyshuari është dërguar në mbajtje pas intervistimit.
Një tjetër rast është raportuar në Partesh në rajonin e Gjilanit, më 17.04.2026 rreth orës 21:30, ku një i dyshuar nën ndikim të alkoolit kishte shkaktuar shqetësim në familje. Pas dyshimeve se posedonte armë, policia ka ndërhyrë dhe ka konfiskuar një pistoletë me dy karikatorë dhe 22 fishekë të kalibrit 7.62 milimetra. Për rastin është njoftuar prokurori.
Po ashtu, në Gjakovë, më 17.04.2026 rreth orës 18:30, gjatë një kontrolli policor është arrestuar një person tek i cili është gjetur një armë zjarri me një karikator dhe katër fishekë. Pas intervistimit, ai është liruar në procedurë të rregullt, me vendim të prokurorit.
Për këto raste, policia me urdhër të prokurorëve të rasteve kanë iniciuar veprën penale të armëmbajtjes pa leje.
