Shoqata e Diabetikëve paralajmëron për mungesë serioze dhe të zgjatur të terapisë antidiabetike, shiritave matëse të sheqerit në gjak dhe sensorëve, gjë që po e përkeqëson seriozisht gjendjen e pacientëve me diabet të tipit 1. Sipas Dime Velev, kryetar i Shoqatës, shumë prej tyre detyrohen t’i blejnë ato me paratë e tyre ose t’i ndajnë mes tyre, gjë që rrit rrezikun e komplikimeve të tilla si hipoglicemia, gangrena ose verbëria.
Sipas pacientëve dhe shoqatave që i përfaqësojnë ata, mungesa përfshin pajisjet e insulinës, glukometrat, shiritat e testimit.
Shoqatat theksojnë se terapia e rregullt është thelbësore për ruajtjen e niveleve normale të sheqerit në gjak dhe parandalimin e pasojave serioze shëndetësore. Mungesa e ilaçeve i vë diabetikët në një situatë të rrezikshme, veçanërisht pacientët kronikë që janë të varur nga terapia.
Sipas botimit të fundit, të 11-të të “Atlasit të Diabetit” të Federatës Ndërkombëtare të Diabetit (IDF), në Maqedoni në vitin 2024, u regjistruan140,800 persona me diabet të moshës 20 deri në 79 vjeç, që përfaqëson një prevalencë prej 7.4 përqind të standardizuar sipas moshës. Të dhënat tregojnë gjithashtu se rreth një e treta e personave me diabet (33.5 përqind) nuk janë diagnostikuar, që do të thotë se rreth 45,000 njerëz në vend jetojnë me diabet pa e ditur.
Për terapinë dhe glukometrat, çdo pacient paguan 200 euro në muaj nga xhepi. Terapia mujore antidiabetike për një person me diabet të tipit 2 kushton rreth 5,000 denarë. Përveç kësaj, duhet të blihen tableta për sistemin kardiovaskular, të cilat kushtojnë 3,200 denarë, dhe duhet të ketë glukometra, të cilët kërkojnë rreth 4,000 denarë. Insulina është falas për diabetikët, që do të thotë se kostoja mujore për një pacient me diabet në shtëpi është rreth 200 euro.
