Pranë konsullatës izraelite në Stamboll ka pasur një shkëmbim zjarri. Sipas raporteve zyrtare, ka të paktën një të vrarë, ndoshta njëri nga sulmuesit. Zona përreth ndërtesës është rrethuar.
Një atentator është vrarë pas shkëmbimit të zjarrit nga forcat e sigurisë pranë konsullatës izraelite në metropolin turk Stamboll . Dy të tjerë janë plagosur dhe janë në paraburgim, sipas guvernatorit Davut Gül. Sipas këtyre raporteve, dy efektivë policie gjithashtu kanë marrë plagë të lehta. Kjo është një “provokim”, deklaroi Gül, pa dhënë detaje të tjera.
Më herët, mediat kishin raportuar se ishin vrarë dy atentatorë. Pamjet treguan forcat e sigurisë përpara ndërtesës së konsullatës në distriktin Levent. Zakonisht ka një prezencë të fortë policie në afërsi të misionit diplomatik.
Hetimet për të shtënat në Stamboll janë në vazhdim
Sipas një postimi të ministrit turk të Brendshëm, Mustafa Cifti, në platformën X, sulmuesit mbërritën me një makinë me qira nga qyteti i Izmitit, i cili ndodhet rreth 100 kilometra në lindje të Stambollit.
Njëri prej tyre kishte lidhje me një grup që “shfrytëzon fenë”, shpjegoi ai, pa përmendur organizatën. Sipas autoriteteve, dy nga sulmuesit ishin vëllezër dhe njëri kishte precedent penal lidhur me drogën.
Aktualisht, nuk ka informacione në lidhje me motivin e sulmuesve. Sipas ministrit turk të Drejtësisë, Akin Gürlek, hetimet tashmë kanë nisur. Sipas raporteve të mediave, konsullata zë një ose dy kate të një grataçiele në qytet. Megjithatë, prej disa vitesh nuk ka pasur staf diplomatik izraelit në Stamboll.
(tgs)
