Sot në Maqedoninë e Veriut shënohet 23 Tetori, datë e cila lidhet me themelimin e një lëvizjeje të fshehtë revolucionare në vitin 1893 në Selanik, të njohur si Organizata e Brendshme Revolucionare Maqedonase (VMORO).
Kjo organizatë u formua gjatë periudhës së sundimit osman dhe synonte autonominë e Maqedonisë përmes organizimit politik dhe luftës së armatosur. Ajo veproi në një hapësirë shumëkombëshe në të cilën bashkëjetonin komunitete të ndryshme etnike, ndërsa aktivitetet e saj patën ndikim në proceset politike në rajon.
Mbledhja themeluese u mbajt në Selanik, në shtëpinë e shitësit të librave Ivan Haxhi Nikolov. Në të morën pjesë:
Hristo Tatarçev
Dame Gruev
Petar Pop Arsov
Ivan Haxhi Nikolov
Anton Dimitrov
Hristo Batanxhiev
Të gjithë ishin pjesëtarë të elitës arsimore të asaj kohe.
Në vitin 1903, organizata u përfshi në Kryengritjen e Ilindenit, e cila përbën një nga ngjarjet më të njohura në historinë e saj. Kryengritja pati pasoja të rëndësishme politike dhe shoqërore për zonat ku u zhvillua, edhe pse objektivat e saj nuk u realizuan plotësisht.
