Pas një sëmundjeje të rëndë, ka ndërruar jetë në Turqi Linda Güler, humanistja, gazetarja dhe prezantuesja me prejardhje nga Kumanova, e cila gjatë jetës së saj la gjurmë përmes përkushtimit, vlerave njerëzore dhe angazhimit në shërbim të komunitetit.
E vendosur prej vitesh në Stamboll, Linda Güler ishte e njohur për veprimtarinë e saj humanitare dhe për kontributin në promovimin e gjuhës dhe kulturës shqiptare. Ajo vlerësohej për afërsinë me njerëzit, ndjeshmërinë dhe gatishmërinë për t’u gjendur pranë atyre që kishin nevojë për ndihmë.
Një pjesë e veçantë e rrugëtimit të saj ishte edhe angazhimi në programet për fëmijë. Përmes punës së saj, ajo arriti të krijojë një lidhje të veçantë me dëgjuesit dhe të mbetet në kujtesën e shumë njerëzve si një zë i dashur, që përcillte ngrohtësi, përkushtim dhe dashuri për botën e fëmijëve.
Linda Güler nuk do të kujtohet vetëm për angazhimin e saj në media, por edhe për karakterin human dhe vlerat njerëzore që e shoqëruan gjatë jetës. Për ata që e njohën, ajo do të mbetet një grua me zemër të madhe, e përkushtuar ndaj njerëzve dhe komunitetit shqiptar.
Lajmi për ndarjen e saj nga jeta ka lënë dhimbje te familjarët, miqtë, të afërmit dhe të gjithë ata që patën rastin ta njohin e të bashkëpunojnë me të. Largimi i saj është një humbje për njerëzit që e çmuan dhe e kujtojnë me respekt për atë që përfaqësonte.
Allahu e mëshiroftë dhe e shpërbleftë me Xhenet! Familjes, të afërmve dhe gjithë dashamirëve të saj, Allahu ua shtoftë durimin dhe ua lehtësoftë dhimbjen për këtë humbje të rëndë.
Qoftë i përjetshëm kujtimi për Linda Güler!
