Në moshën 66-vjeçare ka ndërruar jetë Nuri Bajrami nga Gostivari, jurist, gazetar dhe ish-anëtar e nënkryetar i Komisionit Shtetëror për Parandalimin e Korrupsionit.
Bajrami ishte pjesë e përbërjes së Komisionit Antikorrupsion, ku ushtroi edhe funksionin e nënkryetarit. Gjatë angazhimit të tij në këtë institucion, ai kontribuoi në përpjekjet për parandalimin e korrupsionit, mbrojtjen e integritetit të institucioneve dhe promovimin e përgjegjshmërisë së bartësve të funksioneve publike.
Ai njihej si profesionist me qëndrime të qarta, integritet dhe përkushtim ndaj ligjit dhe interesit publik. Angazhimi i tij në Komisionin Antikorrupsion përbën një nga periudhat më të rëndësishme të karrierës së tij profesionale dhe institucionale.
Përveç punës në institucionet shtetërore, Bajrami la gjurmë edhe në gazetari. Për rreth një dekadë ishte gazetar dhe kryeredaktor në televizionin “TV2”, ku dha kontribut në informimin profesional dhe zhvillimin e gazetarisë në gjuhën shqipe.
Me profesion ishte jurist, ndërsa për shumë vite kishte punuar edhe në administratën e Komunës së Gostivarit. Në të gjitha detyrat që ushtroi, ai vlerësohej për korrektësinë, profesionalizmin dhe respektin ndaj kolegëve dhe qytetarëve.
Lajmi për vdekjen e tij ka shkaktuar pikëllim te familjarët, miqtë, kolegët dhe bashkëpunëtorët e shumtë nga gazetaria, administrata publike dhe institucionet shtetërore.
Familja Bajrami ka njoftuar se varrimi i të ndjerit do të bëhet sot, pas faljes së namazit të ikindisë.
